عندي مشكلة كبيرة قالبة حياتي رأسا على عقب
عندي ٣٢ سنة متزوجة من ١٤ سنة عشت طفولتي في بيت للأسف كله مشاكل بين بابا وماما و تزوجت من شاب أكبر مني ب٤ سنين هو حاليا ٣٦ سنة بصراحة عوضني كل حاجة وىحشة شفتها في حياتي كريم جدا مهذب جدا عمره ما ضىربني ولا شىتمني بار جدا بوالديه بيصلي علطول في الجامع خدوم وأهله ناس محترمين جدا وبيحترموني وبيحبوني وأنا بحبهم زوجي بيشتغل شغلانتين علشان احنا بدأنا من الصفر مع بعض لحد ما ربنا وسع علينا الحمد لله ورزقنا ٣ عيال بنت وولدين وهو مهتم جدا بيهم وبيصرف علينا كويس ومبيبخلش بأي حاجة وهو شخص رياضي مهتم أوي بلياقته ورشاقته وعضلاته وطبعا بياكل أكل صحي وبيتمرن يوميا في الجيم تقريبا ،
في المقابل ربنا يعلم انا حطاه في عيني ومهتمة جدا بنفسي ومظهري وقوامي ونظافة بيتي وأولادي لأنه مبيقبلش أي تقصير في الحاجات دي وعلشان أكون منصفة هو حد في المجمل العام كويس ومعيشنا عيشة كويسة فسح وخروجات كل أسبوع ومصايف كل سنة في حتت فخمة وانا تليفونه في ايدي علطول مش عامله باسوورد أصلا وعمري ما لاحظت حاجة مش تمام هو أصلا ملوش أوي في السوشيال ميديا لأنه مش فاضي أصلا فوجئت بيه بيقولي انا عايز أتجوز وفي بنت قابلة بظروفي طبعا انهارت تماما كأنه والله اداني بسىكينة في قلبي ليه بس ليه عايز تشقلب حياتك محنا عايشين في سعادة وحياتنا كويسة ومش ناقصك حاجة يقولي
لأ سبيني اتجوز ومش هقصر معاكي في أي مصاريف هتجنن انا لا يمكن أقبل كدة ولو الموضوع مشي زي ما هو عايز أنا هطلب الطىلاق ومش عارفة هيصرف ازاي على بيت تالت لأنه أصلا بيصرف على اخته المطىلقة وأولادها وبقوله هو طفاسة وخلاص يقولي ايوة هو ربنا خلق الرجالة طفسين علشان كدة حللهم انهم يتجوزوا ٤ والله ما طايقة أبص في وشه رغم اني كنت بعشق تراب رجله المشكلة مش متخيلة الحياة من غيره بردو هو ليه موقفين كان جدع جدا فيهم أولا تعبت تعب غريب حير الأطباء كنت بفضل دايخة ومكىسرة طول اليوم قعدت على كدة ٣ سنين لف معايا مصر كلها على أغلى الدكاترة وجميع التخصصات الطبية وتحاليل وأشعات بالهبل دون
جدوى كله بيقول مفيش حاجة لكن اللي كان مصبرني شوية بعد إيماني بالله انه كان محتويني وداعمني جدا ويقولي متعمليش حاجة انا هجيب شغالة تعمل ونحاسبها عادي ونجيب أكل جاهز ايه المشكلة لحد ما تبقي كويسة لحد ما هو قالي أنا هحججك يمكن ربنا يشفيكي وباع عربيتنا وحج معايا طبعا علشان يكون محرم لي رغم انه حج قبل كدة واتكلف حجنا احنا الاتنين حوالي ١٧٠ الف في ٢٠١٩ وشاف المرار معايا هناك كنت بتعب يفضل يجرني على كرسي ٨ كيلو اللي هو جسر الجمرات لدرجة الناس كانوا فاكرني أمه ولما بابا الله يرحمه تعب التعب اللي مىات فيه كان واقف معاه مبيسيبوش نهائي ويشيله ويوديه المستشفي ويقعد معاه مرافق بالأيام رغم ان اخواتي كانوا بيتحججوا بالشغل وفي اللي كان بيقول على بابا هو اللي عمل في نفسه كدة من اللي كان بيشربه !!
أنا في مىصيبة حقيقية اكتشفت ان كل دا كان تمثيل ولا بيحبني ولا حاجة وعمر ما زوج بيحب مراته يتجوز عليها هو لسة متنيلش بس بيقولي انا ممكن أوقف الموضوع علشانك لكن هتبقي ظىلمتيني لأن دا حقي وقالب وشه طبعا المشكلة ان البنت أصغر منه ب١٢ سنة وبنت متزوجتش قبل كدة ربنا ينتىقم منها ومن كل واحدة عايزة تبني سعادتها على أنقاض سعادة امرأة أخرى بنات دماغها خىربانة عيلة لسة عندها ٢٤ سنة ومش وحىشة على فكرة ايه اللي يخليها تقبل بوضع زي دا بواحد متجوز وعنده ٣ عيال وعايش حياة هادئة وسعيدة مع مراته
أنا لما كنت بقول لجوزي دا نفسي أرد جمايلك عليا عاوزة أروح لامك اعملها الشىقة والأكل لأنها تعبانة النهاردة بيرفض ويقولي أمي انا اللي هتسأل عليها قدام ربنا مش انتي وساعات كان بيجيبلها واحدة تشتغل عندها على حسابه هو ويقولي روحي اعملي لامك انتي هي اولى بصحتك يعني ييفهم اهو ازاي يعمل كدة بقى وازاي عايز يكىسر قلب واحدة بقالها معاه ١٤ سنة كنا على قدنا خالص وربنا كرمنا من وسع ليه الافترا على خلق الله بدون تحريح من فضلكم اعمل اي
