حماتي غيرت اسم بنتي وانا تحت تأ,ثير بنج الولادة
ازاي حماتي غيرت اسم بنتي وانا لسه تحت تأثير التخدير بعد الولاده؟؟
تقول صاحبة القصة:
حماتي استغلت إني لسه مفوقتش من التخدير بعد الولاده القيصري عشان تغير اسم بنتي في كل الأوراق القانونية.. لما فوقت وبقيت مركزه بعد 3 أيام وقبل ما أسيب المستشفى.. اكتشفت إن اسم بنتي في شهادة الميلاد باتريشا مش لونا..
حماتي كانت شايفه إن اسم لونا ده اسم جديد مالوش لازمه.. قالت لي بكل جديه” أنا انقذت حفيدتي من اسم يجيب لها إحراج طول حياتها”
جوزي كان موجود وسامع بس منطقش.. ماكنتش مصدقه اللي بيحصل.. أنا فضلت 9 شهور بحلم بالليوم اللي لونا هتتولد فيه.. كل حاجة خططنا لها كان لها علاقة بالاسم “لونا” يعني القمر..
الأوضة كان مرسوم فيها قمر وحواليه نجوم كتير.. كنت طالبه لبنتي لبس وبطانية وحاجات كتير شخصية مكتوب عليها “لونا” كنت بحلم أقولها البيبي القمر بتاعي..
كنت بكلم نفسي.. بسأل “ازاي اللي بيحصل ده كله قانوني!!” كنت لسه تعبانه من الولادة بس ماكنش ينفع أسكت.. روحت لإدارة المستشفى واتكلمت معاهم.. وقولت لهم إن اللي حصل ده غلط وضد إرادتي أنا وأبوها وازاي يسمحوا لجدتها تعمل كده..
المستشفى كان ردهم إن دي جدة الطفلة وقالت إن الورق اللي قدمتوه فيه غلط.. وإنها بتصلح الغلط ده بناء على طلبكم.. محدش بلغ الإدارة قبل الولادة بأي حاجة بخصوص الاسم.. وكمان لأن حماتي كانت شغاله قبل كده في الإدارة في نفس المستشفى.. ف ماكنش عندهم أي سبب إنهم ميثقوش فيها..
ساعتها عرفت إنها كانت مخططه لكل حاجة من الأول.. من وقت ما أصرت إني أولد في المستشفى دي بالتحديد.. كانت عارفه الناس فيها.. عارفه السياسة بتاعة الإدارة.. وعارفه إن محدش هيراجع وراها.. حتى الورق اللي جابت عليه توقيع مزور ليا محدش راجعه وراها..
لما حاولنا نتكلم معاها تاني أنا وجوزي ونفهم منها ايه اللي حصل.. كان ردها “باتريشا ده اسم أمي.. دي تقاليد العيله عندنا”
جوزي أخيرًا رد “ماما.. مينفعش تـ… ”
قاطعته في الكلام وردت “خلاص يا مايكل اللي حصل حصل.. الاسم خلاص بقى متسجل في سجلات الولايه.. أصلا لونا ماكنش اسم عدل من الأول”
كنت حاسه إني محبوسه في سريري.. مش قادرة اتحرك من الألم.. شايله بنتي اللي بكره اسمها.. ومش عارفه اعمل ايه..
تاني يوم اتصلت بالمستشفى.. طلبت إني أكلم المدير.. بس رده كان “أنا اسف بس الورق كله خلاص خرج من عندنا وبقى في السجلات بتاع الولاية.. حماتك جابت الورق المظبوط وقالت إن كان في غلط في الورق الأولاني”
قولت له “هي زورت توقيعي على الورق”
سألني “معاكي دليل على كلامك ده؟”
ماكنش عندي أي دليل.. أنا أصلًا ماكنتش في وعيي لما هي عملت كل ده.. كلمت محامي واللي قالي الأخبار اللي تقريبًا حطمتني.. لو مفيش دليل ملموس على التزوير.. القضية هتبقى مكلفة جدًا.. حوالي 15 ألف دولار على الأقل.. ومفيش ضمان إننا نكسب..
ماكنش معانا أكيد المبلغ ده خصوصًا إننا صرفنا فلوس كتير على تجهيز أوضة البنت والولاده والحاجات اللي اشتريناها..
بس لا أنا مش هستسلم.. فضلت أسابيع بكلم كل وأي مكان ممكن يساعدني.. بكتب شكاوي وجوابات لكل جهة.. بتحايل حرفيًا على كل موظف.. مكتب السجلات في الولاية.. إدارة المستشفى.. أي حد عنده استعداد يسمعني.. كنت بقول لهم “أرجوكوا… دي هوية بنتي.. انا عمري ما وافقت على تغيير اسمها.. ”
أغلبهم كانوا بيرفضوا يكملوا المكالمة وبيقفلوا في وشي.. بس أخيرًا ربنا كرمني ولقيت اللي يسمعني… بعد شهرين من المحاولات المستمرة لقيت موظفة في مكتب السجلات قعدتني قدامها وقالت لي بهدوء “بصي يا حبيبتي.. أنا شوفت اللي حصل معاكي ده قبل كده.. لو عرفتي تجيبي دليل واحد إن حماتك عملت كده هنقدر نغير الاسم.. أي حاجة.. رسالة.. ايميل.. أي دليل”
روحت البيت وبدأت أراجع كل حاجة.. فضلت أفتش في الشات بيني وبين حماتي وبينها وبين جوزي.. ملقتش حاجة.. لحد ما افتكرت الرسالة اللي بتعتتها في نفس يوم ولادتي للجروب بتاع العيلة..
كانت كاتبه ” باتريشا روز جونسون وصلت.. وأنا قدرت أخلي أسمها مناسب بدل الهبل اللي كانوا عايزينه.. قال لونا قال”
الرسالة دي كانت كفاية عشان الموظفة تساعدني أقدم طلب عاجل للمحكمة.. بعد 3 أسابيع كان في جلسة استماع ف المحكمة.. حماتي جت ومعاها المحامي بتاعها
المحامي وقف قدام القاضي وقال”موكلتي كانت بتحاول ببساطة تصحح حاجة هي كانت معتقدة إنه غلط موظف.. ماكنتش تعرف رغبة الأب والأم”
بس القاضي قرا الرسالة بتاعتها بصوت عالي.. ” وأنا قدرت أخلي أسمها مناسب بدل الهبل اللي كانوا عايزينه.. قال لونا قال”
القاضي كمل كلامه “من الواضح إن موكلتك ماكنتش بتصلح غلط موظف.. هي ببساطة كانت عايزه تفرض رغبتها على رغبة أبو وأم البنت..”
القاضي حكم لنا في نفس الجلسة بتعديل اسم بنتي عشان يبقى “لونا روز جونسون” حماتي طبعًا قلبت وشها مش عاجبها الحكم.. بس الانتصار الحقيقي عليها جه في نفس اليوم..
جوزي اللي كان ساكت طول الرحلة دي.. أخيرًا لقى صوته.. راح ناحية أمه بعد ما طلعنا من قاعة المحكمة وقال لها “ماما.. أنا مش عايزك تيجي لي بيتي تاني..”
حماتي ردت “مايكل.. لو سمحت اسمعني”
مايكل قاطعها “انتي سرقتي هوية بنتي.. زورتي توقيع مراتي.. جبتي لها تروما في أكتر وقت كانت فيه ضعيفة في حياتها..”
بدأت تعيط وهي بتحاول تبرر موقفها “أنا بس كنت عايزه”
مايكل قاطعها تاني “مش فارق معايا كنتي عايزه ايه.. كفاية أوي كل مرة سبتك تاخدي قرارات تخص بيتي..”
من ساعتها عدت سنتين وفعلًا مايكل مسمحلهاش تدخل البيت.. كانت بتبعت كروت لبنتي في عيد ميلادها.. محدش كان بيفتحها.. كانت بتتصل وبتبعت رسايل مكناش بنرد عليها..
لونا دلوقتي بدأت تمشي وتتكلم.. بتقول ماما وبابا.. بنتي مبسوطة وسعيدة متعرفش إن جدتها كانت بتحاول تمحي هويتها حتى من قبل ما تبقى قادرة إنها تنطق..
أحيانًا بسأل نفسي لو كنا قاسيين مع حماتي بزيادة.. بس برجع أقول لنفسي إن في انتهاكات مينفعش نتسامح معاها.. حتى لو كانت الانتهاكات دي من جوه العيلة..
#احاديث_تيكتوكيه
