حماتي عايشة معايا بقالها ٩شهور

حماتي عايشه معايا بقالها 9شهور وبعد 28سنه جواز حمايا إتجوز وجاب مراته تعيش معاها ولما اعترضت ورفضت الوضع مد أيده عليها وطلقها وليها اخين بس مش كويسين ف حقها ومقاطعاهم من زمان ،وقتها حاولت أحل بينهم حمايا مقبلش مني ولا من حد كلام وقفل باب الصلح ف وش الكل وهيا كمان رفضت الرجوع
جت قعدت معانا ف شقتي وبصراحة انا بحبها وتكرم العمر لأجل خاطر مراتي ،بعد أسبوع قالت همشي ومتضرره من وجودها عشان شايفه اننا مش واخدين راحتنا ،رفضت وقولتلها مش هتمشي والبيت بيتك وامي الله يباركلها بتطلعلها بطيب بخاطرها بأي حاجه حلوه عملاها تحت او اي اكل حلو عملاه.
من تاني شهر وأنا الراتب بتاعي حسيت ببركته واللي كان بيخلص قبل الشهر بقى بيكمل لاخره وبيفيض وده خلاني أتمسك بوجودها اكتر وقولت فيه خير هشوفه بسبب إحساني ليها.
تعبت شويه واكتشفنا أن عندها كانسر ثدى وكان ضرورى تعمل عمليه ف أقرب وقت ،مراتي باعت دهبها وأمي ادتني خاتمها وساهمت معانا ربنا يشفيها وعملت العمليه..
كان فات ٦ شهور وابويا متضرر طول الوقت من وجودها ويقولي محدش بيعمل كده انت عيالك أولى بكل قرش وهيا تشوفلها شقه وتنزل تشتغل وتصرف على نفسها ،قولتله يحج ربنا باعتها خير ليا وتكرم لأجل بنتها اللي شيلاني ف عنيها من زمان واللي مكنش بيقضينا طول الشهر بسبب اللي بعمله معاها بقى بيفيض بعد الشهر وأنا راضي ومش متضرر وكل ده وعمال ينخور عشان يعرف فلوس عمليتها الأولى جت منين وأمي تقوله عملتها على نفقة لدوله.
حماتي ومراتي ف شقتهم وحماتي مبتنزلش تحت عشان كلام الناس وشقتي ليها مدخل رئيسي من الارضى منفصل بس ابويا محسسنى اننا قاعدين معاه ف قلب الشقه تحت وبندخل وبنخرج من عنده
المهم الشهر اللي فات التعب رد عليها تانى ورد أسوء من المرة الأولي وكنت بلف حوالين نفسي ممعاييش ولا جنيه من تمنها والحمد لله اللي وقف معايا أمي واستلفتلى ٤٠ ألف من خالها والحمد لله عملت عمليتها ولحد الآن كويسة.
انا والله سعيد بوجودها معانا وهيا حنينه جداً ومراتي بنت أصول مقدره موقفي وبقت بتتمنالي الرضا ارضى لحد ما حسيت بحواجز بينا لأنها زي مامتها حساسة جداً ،قولتلها ده مش واجب بعمله مع امك ده حق من حقوقك عليا ف اتعاملي معايا زي ما كنتي بتتعاملي.
يعني امي بتصعب عليها حماتي ووقفت معايا ف العمليتين من ورا ابويا عشان ميعملش مشاكل ومشكلتي ف ابويا امبارح نازلين أخرجهم شويه لقيته طالع بيقولها القاعدة هنا جنب بنتك حلوه يا حاجه ولا إيه ، مراتي كنت باخد منها الولد وإيديها ف إيدي لقيت جسمها إتنفض من خوفها ،قولتله يحج هيا اللي قاعدتها حلوه وشقة بنتها تحت أمرها العمر كله ،للاسف حماتي اتكسر خاطرها وعيطت ولما رجعنا قالت همشي وملكوش دعوه أنا هتصرف ،حلفت عليها ما هيا ماشية وقولتلها الشقه دي بأسمي ، ابويا على راسي بس محدش له حق التحكم ف بيتي غيرى ودي شقة بنتك.
زعلت من ابويا وعاتبته للأسف قالي انت خايب ومش واعي لمصالحك وبدل ما تعمل مستقبل لعيالك بضيع رزقهم على جدتهم .
طيب انا اعمل إيه ؟
حماتي ملهاش حقوق ومتجوزه بدون قايمه ومراتى وحيده ،ولو نويت أخدلها شقه وهيا حاليا عندها ٦١ سنه ،هجيب ليها فرش منين ولا ادفعلها إيجار منين ولا هفرشها منين وكل ده هعمله ازاي وعليا دين من عمليتها ضرورى يدفع ف وقت قصير ف مفيش حل غير أنها تفضل موجودة وانا ابويا مش مريح ولا مبطل تلقيح وللأسف مش هعرف أنزل مراتي شغل وأقولها شيلي مسئوليه أمك لو فكرت تاخد شقه إيجار لأن ولادي صغيرين لسا ومش هاخد قرار يكون ع حساب رعايتهم وتربيتهم وأنا بالوضع الحالي مش مقصر وربنا ساترنا ،ف اعمل اي مع ابويا لاني مش عاوز ازعله منه وكل اللي عاوزه منه يطلع حماتي من دماغه لاني مباخدش منه جنيه ولا عملي حاجة ف حياتي أصلا غير انه جابني للدنيا.